周日(18日)晚英超，李斯特城主場以2比0擊敗葉士域治。已落實今夏離隊嘅38歲老將華Dee，喺佢第500次為李城上陣嘅賽事中射入一球，效力李斯特城13年間，喺各項賽事累積攻入200球，完美告別。
由於李斯特城下場煞科戰將作客般尼茅夫，今場主場賽事就成為占美華迪嘅告別戰，佢亦獲得正選上陣。呢位射手果然不負眾望，喺28分鐘就取得入球，球場大螢幕隨即顯示佢嘅大頭肖像同「200」字樣，慶祝佢達成呢個重要里程碑。
另外，占美華迪今季喺聯賽共創造13個入球，包括射入9球及貢獻4次助攻，追平咗英超史上37歲以上球員單季創造最多入球嘅紀錄。另一位達成此成就嘅係前曼聯名宿舒寧咸，佢喺2003/04球季同樣創造咗13個入球。換邊後，基斯麥艾達亦攻入一球，為李斯特城鎖定2比0勝局。
賽後，主角占美華迪表示：「我好享受效力李斯特城嘅每一個時刻，我會繼續關注呢隊我熱愛嘅球隊，你哋永遠留喺我心中。我要感謝大家接納我同埋對我家人嘅支持，我希望一直以來嘅努力，可以回報到大家。」華迪喺李斯特城效力13年，最輝煌嘅成就莫過於協助球隊喺2015/16球季爆冷奪得英超冠軍，以及喺2020/21球季捧起英格蘭足總盃冠軍。雖然華迪即將離開李斯特城，但佢仍未打算退休，早前曾傳出狼隊有意羅致佢。
延伸閱讀：
